Aaj media me ek shor barpa hai aur har koi washing powder ki advertisement ki tarha cheekh raha hai ki, “mera sach tumhare sach se zyada safed hai!” Har koi chahta hai ki sach uska sath de, lekin sach ka saath koi nahi dena chahta hai.

“Momino! Tum Allaah se daro aur durust baat kiya karo.”

“O you who have believed, fear Allah and speak words of appropriate justice.”
(Qur’an • Al-Ahzab 33:70)

Sach kahna bahut aasan hai lekin hum sab jaante hain ki sach, khaas karke kadwa sach (bitter truth) kahne ke baad ya aisa sach kahne ke baad jo kisi jhoote insan ka parda’fash kar de, kuch nazuk mauqe aise hote hain ki sach kahne wale ko takleef, mushkilaat, masaail aur masaaib (difficult situation) ka saamna karna padta hai. Toh, sach bolne wale ko chahiye ki woh aise haalat ke liye apna izhar e khayala karne se pahle hi tayyar rahe, apne aapko mentally prepare kar ke rakhe ki chahe kuchh bhi ho jaye, mein apne maukif se, sachchai ke raaste se hatunga nahi aur isteqamat ke sath apni baat par jama rahunga. Yani sach kahna aasan hota hai lekin uske baad ki situation me kaee baar opposition aap par haawi hone ki koshish karta hai, aap par kuch pareshaniya aati hai, lekin aakhir me to jeet sach kahne wale ki hi hoti hai, chahe uski maut hi kyon na ho jaye, kyon ki maut aakhri muqaam nahi hai, aakhri muqaam to maidan e hashr hai jaha doodh ka doodh aur paani ka paani ho kar rahta hai. Sach kehne ke liye aapko mansooba’bandi ki, ajeebo gareeb plans banane ki aur jaal bunne ki zaroorat nahi hoti. Sach kahne ke liye aapko confuse hone ki zaroorat nahi hoti. 

Sach kahne ke liye narco test ki zaroorat nahi. Sach bolne wala seedha saamne wale ki aankhon me aankhe daal kar, ek junoon, ek andekhi taaqat aur confidence ke saath sach kahta hai. Use Allaah ke siwa kisi ka darr nahi hota, aur yahi darr use baaki sare logo ke dar se be’khauf kar deta hai. 

Sach ka chehra ek hi hota hai. Jab jhoot ke makhmali labade me lapet kar nakli currency notes ki tarha kisi baat ko sach ka naqaab panha kar sone-chandi ki tash’tariyon ke pesh kiya jaye, tab bhi woh jhoot kabhi sach ka chehra ikhteyar nahi kar sakta. Us kaale, andhere aur ba’zaahir khoobsurat dikhne wale jhoot ka mohra ek na ek din utar jayega, ek na ek din jhoot be’naqaab ho kar rahta hai, chahe us jhoot ke defence me koi edi choti ka zor kyon na laga le. Iske bar’aqs jhoot kahna bhi sach kehne ke jitna hi aasan hota hai, khaas kar ke us shakhs ke liye jo bachpan se chhoti chhoti baton me bahanebazi karne kaa aur jhoot bolne ka aadi ho. 

Iski shuruaat bahut pahle se ho jati hai, kisi ne homework nahi kiya, daddy ke purse se kuchh paise churaye ho, school, college ya office me late aane ke mukhtalif bahane kiye hon.. wagairah. Yeh jhoot ki duniya panapte panapte ek bhayanak shakl ikhtiyar kar leti hai aur phir aage jaa kar woh badi saazishon ke tahat, mansooba’bandi aur planning ke tahat saaf jhoot bolta hai aur itni masoomiyat aur bholepan se, itna naturally jhoot bolta hai ki saamne wale ke paas use sach maan’ne aur samajhne ke siwa koi chara nahi hota. 

Jhoot ki buniyad par ek insan logo me trust aur bharose ki imarat tameer karna chahta hai. Lekin aisa ho nahi sakta. Ek jhoot sau sawaal khade karta hai, aur phir un sawalo ki fehrist lambi hoti hi jaati aur aur jhoot ka intekhab karne wala un sawalo ke jawabo ka fake preparation karte karte dal-dal me phasta hi jata hai. Bil’aakhir isse nikalne ki koi tarkeeb uske paas nahi rahti, yaha tak ki halaat (circumstances) use majboor karte hain ki ab jhoot ki baisaakhi ko phenk kar sach ki kashti me sawaar me hone ke alawa uske paas apni hi banyi hui bhoolbhulaiyya (maze) se nikalne ka koi raasta baki nahi rahta.

Jhoote gawah, jhoote saboot aur jhoote statements ki aakhri dehleej par sach muskurata hua khada hai. Ek na ek din log us sach tak pahuch hi jayenge. 

Koi sach’chayi ka bhi chehra hai?

Bandh aankhon pe kiska pehra hai?

Jhoot sach se bhi sunahra hai..

Waqt do char roz thehra hai!

Insan ko mohlat milti hai ki ab bhi woh iqrar kar le aur jhoot se baaz aa jaye. Jab yeh waqt haath se chal jayega, tab is duniya me koi uske sach ka bhi etbaar nahi karega.. bilkul us kahani wale bachche ki tarha jo har bar “sher aaya sher aaya” ki cheekhen laga kar basti ke logo ko bulata tha aur jab haqeeqat me uski bakriyon par hamla karne ke liye sher aa gaya tab kisi ne uski cheekh o pukaar ki parwah nahi ki aur uske sach ko bhi jhoot man liya, nateejatan use apni maal se hath dhona pada..!

Isi gali ke hai khaak se, Yahin khaak apni milayenge,
Na bulaye aap ke aaye hai, Na nikaale aap ke jayenge..

Hindustan ko hum muslamano ne apne lahoo se sincha hai, is mulk ko humne Tipu Sultan jaisa jaan’baaz sipahi diya, Abul Kalaam Azad jaise education minister diye, Dr. APJ Abdul Kalam jaise nuclear engineering ke expert diye, Khan Abdul Gaffar Khan aur Ashfaqullah Khan jaise freedom fighters diye, mulk ko angrezo se azaadi dilwane ke liye Sadiqpur (Patna) ke ulemao ne qurbaniya di aur kaala paani ki sazayen bardasht ki. Hindustan ki mitti me hamara aur hamare aslaaf ka khoon paseena hai. iLmi satah par is mulk ko humne Usmaniya university di, Jamia Hamdard Unani University di, Aligarh Muslim University di, Maulana Abdul Kalam Azad University di.

Mulk ke ander ek badi saazish ke tahat naujawan nasl ka brainwash kiya ja raha hai. Mulk ki tareekh ko badalne ki purzor koshishen ho rahi hai, siyasi satah par, mazhabi satah par, educational level par. Nafrat ki saudebazi karne wale aur mazhab ke naam par logo me phoot daalne wale sharpasand siyasatdano ke hath me yeh mulk aur iska qanoon kath’putli ban gaya hai. Yeh sharr’pasand siyasat’daan nafrat ki tijaarat kar rahe hain. Unhe maloom hona chahiye ki woh apni naslon me musalmano ke khilaaf nafrat ke jo beej bow rahe hain, isse aur to kuchh hasil na hoga, lekin unki zindagiyon se sukoon aur itminan zaroor chala jayega. Jiske dil me keena, bughz, adawat aur nafrat panapti hai, woh gusse ki aag me jalta rahta hai, yahan tak ki uski zindagi tanaw, tension aur zehni beemariyon ka shikar ho jati hai. Nateeje me woh mustaqbil me apne bachcho ke liye na kabhi achhe baap ban pate hai, apni biwiyon ke liye na kabhi achhe shouhar ban pate hain aur naa hi mulk ke zimmedar aur amanpasand citizen ban pate hain.

Ek waqt tha jab is mulk par muslamno ki huqumat thi, aur us waqt bhi humne is mulk ke har mazhab ko manne wale awaam ke sath insaf aur humdardi ka muamla kiya tha. Mulk ki taraqqi, aman aur khush’haali hamesha se hamara maqsad raha hai. Is mulk par huqumat karne wale har musalman huqmaraan ne is mulk se jitna liya hai usse kaee guna zyaada is mulk ko diya hai, imaraton ki shakl me, tehzeebo tamaddun ki shakl me, maalo asbab ki shakl me, museums aur kilo (forts) ki shakl me, technology ki shakl me aur iLm ki shakl me. Ye ho ho nahi sakta ki islam ki muqammal taleemat par chalne wala ek insan apne mulk se gaddari kare, logo par zulm kare aur na-insaafi kare. Yeh muslaman ka sheva nahi.

Hamen Nabi e akram sallallahu alayhi wa sallam ne yeh talim di hai ki har kisi ke sath chahe wo muslim ho ya ghair muslim (non-muslim). Har kisi se husn e sulook se, achhe akhlaaq (good manners) se pesh aao. Mulk ki aqsariyat (majority) danga, fasad, maar peet, jhagda, tanaw aur tension ki zindagi nahi chahti. Logo ko chahiye employment, development, health, aur civil society me guzari jane wali pursukoon zindagi. Agar aise sharpasand siyasatdaan is mulk ki qayadat (leadership) karte rahe to nuqsan sabka hai, na sirf musalmano ka aur minorities ka balki har kisi ka. Phir bhi islam hame yeh taleem deta hai ki kabhi huqumat ke khilaf baghawat na ki jaye, aur naa hi hum karte hain. Zaroorat is baat ki hai ki jis nafrat ki siyasat ko khatm karne me aur mulk me aman o shanti ka mahol paida karne me saare hindustani ek joot ho jayen.

Jo kuchh bhi pareshaniya, mushkilat aur zulmo sitam is mulk me musalmano par ho rahe hain uska wahid solution yeh hai ki hum deen e islam ki dawat ko aam karen. Is mulk ke constitution ne hame yeh aazadi di hai ki hum apna izhar e khayal kar sakte hain to phir kyon na hum deen e islam ko apne un ghair muslim bhaiyon behno ki taraf pesh karen jo hidayat se mehroom hain! Agar hum aisa karte hain to do baten ho sakti hain, ya to Allah unko hidayat de de aur is mulk me islam ki barkat se aman o shanti phail jaye, aur agar unki taqdeer me hidayat na likhi ho to kam-az-kam hujjat qayam ho jaye. Aur jab kisi qaum par hujjat qayam ho jati hai, to phir Allah ka faisla nafiz hone me der nahi lagti.

Hum muslman aman pasand aur insaf pasand qaum hai. Aaj zaroorat hai ki is mulk ki tareekh badalne walo ko iLmi jawab dene ke liye agar hum padh likh kar IAS aur IPS officer ban sakte ho to bane, scientist bane, teachers, lecturers aur professors bane aur parliament ke, universities ke, judiciary system ke aur government administration ke bade bade ohdo me competitive exams de kar taraqqi-yafta bane, aala tareen muqam hasil karen aur waha se insano ki islah aur falah e insaniyat ka inqilabi kaam shuru karen jise zang lag chuki hai. Sadko par utar kar narebazi karne wale na baen balki media, technology, army, educational institutes aur system ka hissa ban ke logo ke zehno ko sudharne aur sanwarne wale bane.

Agar hum apne iman ko bacha kar rakhen, Allah aur uske Rasool sallallahu alahi wa sallam ki ita’at aur farmabardari karen, sabro tahammul se kaam len aur deen par istiqamat ke sath jame rahen, to in sha Allah ek din zaroor ayega jab phir se is mulk par Allah hum muslamano ko ghalib karega.

Har insan ka aur khusoosan ek musalman ka apni zindagi me ek vision hona chahiye, ek mission hona chahiye, ek maqsad hona chahiye. Be-maqsad zindagi ki koi qeemat nahi. Yahi wajah hai ki aaj muslim identity ko koi salam nahi karta. Ba-maqsad zindagi aane wali naslo ke liye inspiration aur misaal ban jaati hai.

Ek to hota hai shohrat (fame), iqtedar (leadership and power) aur daulat (wealth) ki chahat is qadr rakhna ki wahi ek insan ki zindagi ka pehla aur aakhri maqsad ban jaye. Yeh bilkul jaiz nahi. Lekin agar insan is qadr mahnat’kash ho ki uske na chahte hue bhi log uski tareef karen, use tareef ka shauk na ho, aur use bemisaal qarnamo ki wajah se log use duaen de, uska naam aakhbaron ki surkhiyon me aur tareekh ke panno par sunehre lafzo me likha jaye, to isme kuchh galat nahi.

Agar insan apni qirdaar aur character ko larger than life samjhe aur yeh samjhe ki mujhe na sirf apne aap ke liye, na sirf apne aal aulaad aur gharwalo ke liye balki sari qaum o millat ke liye aur sari insaniyat ke liye kuchh aisa kar jana hai ki meri zindagi ek misal ban jaye aur mujhe Rabb ki qurbat bhi hasil ho jaye, dikhawe ke liye nahi, balki khalis sachhe dil se ikhlas e niyyat ke sath kuchh aisa kar jane ki tamanna jo har lihaz se khair ka bayas ho. Koi aisa invention jo logo ki zindagi aasan kar de. Koi aisi taleem koi aisa idaara (institute) jo imandaar zimmedaro ki nigrani me logo ke ander haqq ki dawat aur taleem ko phailata rahe.

Yeh raasta aasan nahi hai. Isme determination ki aur istiqamat ki zaroorat hai. Koi khwab poora nahi ho sakta jab tak use paseene se na nahlaya jaye. Kabhi to tan’tod (jism ko thaka dene wali) mehnat hoti hai aur kabhi to mann-tod (kadam kadam par logo ke taane, jhidkiyan aur tanqeeden sun sun kar dilo ko tod dene wali, hauslo ko pastt kar dene wali) jaddo jahad hoti hai.

Isme kaee rukawate hoti hai. Shaitan insan ka raasta rokne ki koshish karega, taki woh insaniyat ka bhala na kar sake. Uska apna nafs bhi use pichhe hatayega.  Woh mannne hi nahi dega ki mein bhi yeh achieve kar sakta hu.  Woh manne nahi dega ki mein aam insan nahi hu, mujhse Allah zaroor ba zaroor koi aisa azeem kaam lega jisse mera, mere logo ka aur insaniyat ka mustaqbil sanwar jaye.

Use aise logo ki dosti aur sohbat chhodni hogi jo aawara galiyon me ghum rahe hain ya to phir sirf entertainment aur lahw me zindagi guzar rahe hain. Use apne aapko yeh manwana padega ki mein inn jaisa insan nahi hu. Mein galiyon me, sadko par, parties me, cinema me aur hotels me chai ki chuskiyan lagate hue apni zindagi ka qeemti waqt zaya nahi kar sakta.  I am far greater than that. 

Jab ek insan baamaqsad zindagi jeeta hai to phir uske kadmo ko zindagi ki mamooli thokaren ruka nahi sakti. Woh dugune josh se aage badhta hai.  Kisi ki negative baten use mutassir nahi kar sakti ki woh apne maqsad ko bhool jaye. Uski nazar us nishane par hoti hai jo use paana hai aur uski nazar us manzil par hoti hai jaha use pahuchna hai. Woh har roz yeh sochega ki by the end of the day mein kis hadd tak apne khwab ki taqmeel karne ke direction me aage badha hu. Jise waqayi me kuchh paana hota hai, woh baaten kam karte hain aur kaam zyada. Aur sab se zyada kaam insan ko apne aap par karna padta hai, apne aap ko ander se mazboot banana, apne nafs ko control karna, beja khwahishat se, lahw se aur apne aapko aarasta karna, decorate karna positive thinking se, ki mein zaroor us manzil par pachungua jo mera haasil hai. Jab uske iraade mazboot ho jate hain to phir woh kayenat me apna loha manwa leta hai. Apne aapko prove karne ke liye use ab kisi daleel ki aur excuse ki zaroorat nahi padti kyonki uska amal e khair, uske positive actions khud use secure karte hain, use defend karte hain, use empower karte hain. 

Is raah me kaee martaba aisa hoga ki insan ko kabhi khud apne aap par to kabhi doosro par, apne gharwalo par, bachcho par, staff par, collegues par gussa bhi aayega, chidchidapan bhi aayega, khaas kar ke us waqt jab is process me koi chhote se muqaam par woh ruk jayega aur poora nahi kar payega. Yeh bahut hi nazook aur delicate marhala hota hai. Agar uska pair waha phisal gaya aur woh log jo uska asset, uska sarmaya the, jo uske mission me uska sath de rahe the, agar uska sath chhod de, to ho sakta hai use dobara zero se start karna pade, aisi situations ko use bahut hikmat se control karna hoga. Agar insan me sabr nahi aur halki si chhoti chhoti chize use disturb kar deti hai aur woh makhmal ki kaaleen par hi zindagi ka har lamha guzarna chahta hai to phir aise insan se koi ummeed nahi rakhi ja sakti.  Aaj musalmano ki aqasriyat ka yeh mijaz ho gaya hai. Hadees ka mafhoom hai ki agar gussa aata hai to baith jao aur agar baithe hue ho aur gussa aaye to let jao magar aaj logo ka yeh haal hai ki agar leta hua hai aur gussa aaye to fauran achanak aasteen chadha kar khada ho jata hai int ka jawab paththar se dene ke liye. 

Narated By Abu Dharr radiyallaho anho : The Prophet of Allah (sallallahu alaihi wa sallam) said to us: “When one of you becomes angry while standing, he should sit down. If the anger leaves him, well and good; otherwise he should lie down.” 

Abu Dawud Book 036, Hadith Number 4764

Chhoti chhoti bato me insan apne qareebi logo ko aise kalemaat keh deta hai ki “mein tujhse zindagi bhi baat nahi karunga”, “kabhi apni shakl mat dikhana”, “kabhi meri chaukhat par kadam nahi rakhna”, “meri mayyat par bhi na aana” wagairah! Use is duniya ko fatah karne se pahle logo ke dilon jo jeetna hoga, achhe akhlaaq se, ba’qirdaar ban kar aur achhe lafzo ka istemal karke ahsan andaz me logo se pesh aakar. 

Quran me aata hai–

“Kya tumne nahi dekha ki Allah ne paak kalima ki kaisi misal di hai ki woh mushaaba hai paakiza darakht ke jis ki jadd khoob mazboot hai aur shaakhen buland hoti hain aasman ki taraf. Woh darakht apne Rabb ke huqm se har fasl me apna phal laata hai, aur Allah logo ke liye misalen bayan karta hai taake woh nasihat pakden. Aur naapaak kalime ki misaal naapaak darakht ki si hai ke woh zameen ke oopar se hi ukhaad liya jaaye, use zara bhi qaraar nahi rehta. “

(Surah Ibrahim 14:24-26)

“Have you not considered how Allah presents an example, [making] a good word like a good tree, whose root is firmly fixed and its branches [high] in the sky? It produces its fruit all the time, by permission of its Lord. And Allah presents examples for the people that perhaps they will be reminded. And the example of a bad word is like a bad tree, uprooted from the surface of the earth, not having any stability.”

(Surah Ibrahim 14:24-26)

Ek purani Chinese kahawat hai ki “agar aap muskura nahi sakte to aapko dukaan nahi kholni chahiye!” Yahi wajah hai ki aaj China duniya ki har market par chhaya hua nazar aa raha hai aur har economy ko strong competition de raha hai.

Jis insan ka maqsad bada hota hai woh aisi chhoti chhoti baton me nahi ulajh sakta. Baamaqsad zindagi jeene wale insan ke ander taqabbur, ghamand, hasad, gussa aur bugz panap hi nahi sakta. Uske paas in chizo ke liye waqt hi nahi hota aur aise shaitani waswaso ke liye uske dil me kabhi jagah ho hi nahi sakti. Jis insan ko kuch extraordinary banana hota hai woh apne aap ko mehnat aur mashakkat ki bhatti me is qadr garam kar ke pighla deta hai ki uske ander ki sari negativity nikal jati hai aur use dikhta hai to sirf apna woh aalatareen maqsad jaha use pahuchna hai. Use nikalna hoga narrow mindedness ki giraft se, use us qaid se nikalna hoga jo use mehdood kar ke rakhti hai ki tere yeh limitations hai aur tu yeh kaam kar hi nahi sakta. Use doosro ko convince karne se pehle apne aapko yeh bharosa dilana hoga ki mein faltoo aur bekar chizo aur bure khayalato ko apne ander paalne ke liye nahi bana. Tab jaa kar use woh experience aur tajurba hasil hoga jo use  maqam o martabe tak us manzil tak le jayega, jaha pahuchne me qaumo ko sadiyan (centuries) lag gayi.

“Goya ki jab woh qiyamat ko dekhenge to khayal karenge ki duniya mein to woh ek shaam ya ek subha rahe the. “ (Surah Nazi’at 79:46)

“It will be, on the Day they see it, as though they had not remained [in the world] except for an afternoon or a morning thereof.” (Surah Nazi’at 79:46)

Yad’dasht: Ek Nemat

Yad’dasht ek ajeeb chiz hai. Yeh Allah ki taraf se insan ko di gayi ek badi ne’mat bhi hai. Kabhi aisa hota hai ki hume salon saal ki puraani baten to yaad hoti hain lekin chand minute pahle hi apne ghar me ya office me koi chiz hamne apne hi hathon se kaha rakh di, yaad nahi rahta aur hum dhoond’te rahte hain. Kabhi aisa hota hai ki kuchh baten hum bhool jate hain aur hamare bachche hame yaad dilate hain.

Yad’dasht: Jannat ke aa’al darjaat hasil karne ka zariya

Hum mu’ashre me dekhte hain ki bachcho ki memory ko sharp karne ke liye parents unhe dry fruits, tarha tarha ke tonics, dawaiyan aur nuskhe dete hain. Maqsad yeh hota hai ki unki memory sharp ho jaye, yad’dashte aur hafiza mazboot ho jaye, taki woh padhayi me (academic career me) khoob aage badhen aur examination me acche se acche marks aur grade se paas ho kar unka naam roshan karen. Yeh rawayya to thik hai lekin agar ek musalman memory ko sahi maano me utilize karna chahta ho to use chahiye ki khud bhi Qur’an ko zyada se zyada yaad kare, aur apne bachcho ko bhi ho sake to mukammal Qur’an hifz karwaye. Kyonki hadees me aaya hai ki Quran ke hafiz ko kaha jayega (mafhoom) ki Quran padhte jao aur jannat ke darje (levels) chadhte jao, jis tarha tum duniya me tilawat karte the, jaha tum aakhri ayat par rukoge wahi tumhari aakhri manzil hogi. Isse pata chalta hai ki jannat ke darjaat ka daro madaar is baat par hai ki kisne kitna Quran hifz kiya hai (aur us par kitna amal kiya hai).

Narrated ‘Abd-Allaah ibn ‘Amr that the Prophet (peace and blessings of Allaah be upon him) said: “It will be said to the companion of the Qur’aan: Recite and rise in status, recite as you used to recite in the world, for your status will be at the last verse that you recite.”

Al-Tirmidhi (2914) and Abu Dawood (1464) , Classed as saheeh by al-Albaani in al-Silsilah al-Saheehah, 5/218, no. 2240

Bhoolna: Insan ki aadat

Insan jab aalam e arwaah me tha, tab bhi ek zindagi thi, woh use bhool gaya, phir maa ke pet me woh 9 maah tak raha aur us arse ko bhi bhool gaya. Hum me se shayad hi koi ho jise use uska bachpan yaad ho. Phir jab budhapa aa jata hai to woh ahista ahista jawani ke lamhaat bhi bhool jaya karta hai.

Insan ki yeh hamesha se aadat rahi hai ki woh aakhirat ko, qabr ko, Allah ki ata qarda nemato ko aur urooj paa lene ke baad apne zawal ke maazi ko (past ko) bhool jata hai. Koi agar us par kuchh ehsan karta hai to woh bhool jata hai aur palat kar nahi dekhta. Insan apni maut ko bhool kar duniya me is tarha zindagi guzaar raha hai goya ki hamesha yaha rahna hai.

Gunahon ko Yaad Karna:

Jab kisi momin musalman se koi gunah ho jata hai aur jab uska nafs malamat karta hai, jab use tawfeek hoti hai to who Allah ki bargaah me tauba karta hai. Yeh pahla marhala hai, jisme woh nadamat ke aansu bahata hai, apne gunaho ka etraaf karta hai, us gunah ko repeat na karne ka ahad karta hai aur Allah se bakhshish talab karta hai. Iske baad ka marhala woh hota hai ki, jab kabhi mauka milta hai wo istighfaar karta rahta hai, yani us gunaho ko baar baar yaad karke Allah se dubara maghfirat ki ummid rakhte hue, maafi mangta hai, istighfar ka fayeda yeh hai ki uske gunah mit’te jate hain, (erase ho jate hai) aur phir agar wo ek ke baad ek apne gunaho ko yaad kar kar ke istighfar karta rahe to uske gunah nekiyon me tabdeel ho jate hai, woh Allah ki qurbat hasil karta hai aur Allah ka mahboob banda ban jata hai.

Allah ko yaad karne aur Allah ka zikr karne ke fawaid

Hadees e Qudsi hai jisme Allah subhanahu wa tala farmata hai (mafhoom), “Mein (apne band ke sath) waisa hu, jaisa woh Mujhse tawakko rakhta hai, aur Mein uske sath hota hu jab who Mujhe yaad karta hai. Jab woh (banda) Mujhe apne jee me yaad karta hai, to Mein use apne jee me yaad karta hu. Agar who mujhe mehfil me yaad karta hai, to mein usse bahtar mehfil me (farishto ke beech) use yaad karta hu…”

“Allah the Exalted says: I am as my servant expects me and I am with him as he remembers me. If he remembers me in himself, then I will remember him in myself. If he mentions me in a gathering, then I will mention him in a greater gathering….” Source: Ṣaḥīḥ al-Bukhārī 6970, Grade: Muttafaqun Alayhi

Ilm hasil karne aur deen ki baton ko yaad rakhne me kotaahi

Insano ki aur khusoosan musalmano ki aksariyat (majority) ki mushkil yeh hai ki woh yaad rakhne ki chize yaad nahi rakhte aur na yaad rakhne ki chize hamesha yaad rakha karte hain. Kaee musalman aise hain jo jumuah ka khutba aur koi aur dars kisi Masjid me ya program me sunte hain, lekin bahar nikalne ke baad ya kuch dino ke baad unhe us dars me batlayi gayi nasihaten bhi yaad nahi rahti aur kaee to aise hain jinhe topic ya mauzu jis par guftagoo hui thi woh bhi yaad nahi rahta. Kaee musalman aise hain jo kisi ek topic par (for example namaz/salah, wuzoo, roza) par 10 minutes tak Quran aur Sahi Ahadees ki roshni me us mauzu se jude kuchh masail par ek healthy discussion bhi nahi kar paate. Iske bar’aqs (contarary) ghaur talab mamla yeh hai ki unhe cricket ke scores, cricketers aur film stars ke naam, movies ka songs aur dialogs bakhoobi yaad rahte hain. Yeh dar’asl ek fitna hai aur Allah ki ata’qarda memory ki nemat ka galat istemal hai. Agar sahi istemal nahi kar sakte to kam se kam galat istemal to hargiz na karen.

Memory Restoration

Insan ka jism qabr me khatm ho kar fana ho jata hai lekin hum sab jaante hain ki hame phir se dubara uthna hai aur hamare jism koi phir assar-e-nau banaya jayega. Isi ke sath sath hamari purani memories aur yaad’dasht ko bhi restore kiya jayega. Surah Kahf me aata hai ki jab insan ko uska naam-e-aamal ya kitab di jayegi to woh tajjub karega ki yeh kaisi kitab hai jisme koi chhoti ya badi baat (meri zindagi ki) darj nahi hai. Use woh sari nemate bhi yaad dilayi jayegi jo us par ki gayi thi, jiske bawajood woh nashukra bana aur ibadaat me kotahi ki thi. Qabr ki sakhti aur jahannum ki haulnaaki use duniya ki har aish o ishrat bhula degi. Jab usse puchha jayega ki tum duniya me kitne din ke liye the to kahega ki mein ek din ya uska kuchh lamha hi tha.

Aur aamal naama saamne rakh diya jayega to aap dekhenge gunahgaron ko ke khauf kar rahe honge usse jo isme likha hoga aur kahenge, Afsos! Yeh kitab kaisi ajeeb hai, nahi chhori is ne koi chhoti baat aur na badi baghair likhe, aur jo a’maal kiye the woh sab maujood paaenge, aur tumhara Rabb kisi par zulm na karega (Surah Kahf 18:49)

“And the record (of deeds) will be placed [open], and you will see the criminals fearful of that within it, and they will say, “Oh, woe to us! What is this book that leaves nothing small or great except that it has enumerated it?” And they will find what they did present (before them). And your Lord does injustice to no one.” (Surah Kahf 18:49)

Yaad rakhna aur Yaad Karna

Ek to hota hai yaad rakhna aur doosra hota hai yaad karna. Nabi sallallahu alaihi wa sallam ne Ayesha radiyallaho anho se farmaya (mafhoom / aw qama qaal) ki teen marhale aise hain jab koi kisi ko yaad nahi karega. Ek woh waqt jab nam-e-aamal taqseem kiya jayega, doosra jab mizaan qayam kiya jayega aur teesra jab pool sirat se guzarna hoga.

“Aur dozakh us roz hazir ki jayegi aur insan us roz sochega, aur ab use sochne ka waqt kahan?” (Surah Al-Fajr 89:23)

And brought [within view], that Day, is Hell – that Day, man will remember, but what good to him will be the remembrance? (Surah Al-Fajr 89:23)

Allah hum sabko hamesha aakhirat ko aur maut ko yaad karne ki aur uski tayyari karne ki tawfeek ata farmaye aur hamara khatima bil khair iman par kare. Aamin.

Kya yeh oont (camel) ko nahi dekhte ke kis tarha paida kiya gaya? Aur aasmaan ki taraf ke kaisa buland kiya gaya hai? Aur Pahaadon ki taraf ke kis tarha khade kiye gaye hain? Aur zameen ki taraf ke kis tarha bichhayi gayi hai? (al-Ghashiyah 88:17-20)

Then do they not look at the camels – how they are created? And at the sky – how it is raised? And at the mountains – how they are erected? And at the earth – how it is spread out? (al-Ghashiyah 88:17-20)

Jab insan ki umr 3-4 saal ki hoti hai to use school me admission diyala jata hai, phir madarse me bheja jata hai, taaki uska iLm hasil karne ke ek mustaqil non-stop safar shuru ho jaye. Yeh umr khelne qoodne ki to hoti hai lekin hum sab samajhte hain ki ab is umr se kuchh na kuchh taleem shuru ho jani chahiye, iske liye yeh ideal age hai.

Phir ek ke baad ek marhale guzarte jate hain, secondary, intermediate, graduation, postgraduation, phd, and so on… Aur isi tarha agar deeni taleem me aage badhta jaye to qaari, hafiz, aalim, fazil, mufti ban jata hai. Lekin iLm hasil karne ke baad 3 chizo ka khayal rakhna bahut zaroori hai.

Ek to yeh ki woh apne ilm se khud fayeda uthaye (jo iLm mila us par amal kare) aur doosron ko bhi fayeda pahuchaye, doosra yeh ki woh kabhi apne iLm par taqabbur, ghamand na kare, arrogance ki feeling ya “I am something” ya “I am better than you” ki feeling kabhi paida na ho, aur teesra yeh ki woh duniya ki rangeeniyon me is qadr na kho jaye ki woh sirf naam nihaad musalman ban kar rah jaye.

Agar insan Allah ki ata-qarda nemato par shukr kare, aur Allah ki is kayenat par ghauro fikr kare to zaroor ba zaroor uske ilm aur iman ki hifazat Allah karega. Jab woh Allah ki makhlooq ko dekh kar Allah ki kibriyai bayan karega, Allah ki hamd bayan karega, subhanAllah kahega, apne haqeer hone aur Allah ke azeem hone ke bare me tadabbur karega, apni nafs ka muhasiba har waqt har lamha karta rahega to uska ilm use zaroor fayeda dega aur us ilm me mazeed izafa bhi hoga aur woh ilm uske liye nafa’baksh bhi sabit hoga.

Agar aisa nahi hoga, to phir zindagi me ek waqt aisa bhi aayega ki uska hasil kiya hua iLm usse door hota chala jayega, aur use guman bhi nahi hoga. Humne kaee logo ko dekha hoga jo Quran hifz karke bhool jate hain.

Kaee logo ko 20-22 saal ki umr me kaee surah yaad hoti hai lekin 40-50 saal ki umr me bhool jate hain. Bachpan me hum me se kaee logo ko arabic matan ke sath ahadees yaad hua karti hogi lekin kaee log bade hokar bhool gaye honge. Jumuah padh kar bahar nikle aur agle jumuah tak to pichhe jumuah ke khutbe ka topic bhi bhool gaye.

Wajah yeh hai ki uska talluk-bil-Allah mazboot nahi, uski Allah ke bare me, Nabi sallallahu alahi wa sallam ke bare me aur jannat aur jannat ke bare me maarifat mukammal nahi. uske paas iLm to bahut hai lekin salah me khushu aur khuzu ki kaifiyat nahi. Use Allah ke zikr me lutf nahi aata.

Use tilawate Quran karke bhi sukoon e qalb nahi milta kyon ki us waqt bhi uska zehan duniya ki rangeeniyon me khoya hua hota hai. use maut ki yaad rulati nahi, use hashr ke maidan ki kaifiyat ka bayan sata’ta nahi. Use duniya se raghbat ho jati hai, duniya ki woh chize jo Allah se door karne wali hai usme uska dil lagna shuru ho jata hai. Nabi sallallahu alaihi wa sallam ne aise ilm se panah mangi jo fayeda na de.

Allahumma inni a’udhu bika min ‘ilmin la yanfa’u wa min qalbin la yakhsha’u wa min nafsin la tashba’u wa min da’watin la yustajabu laha.
O Allah! Indeed I seek refuge in You from knowledge that is not beneficial, and from a heart that does not fear (You), and from a soul that is not satisfied, and from a prayer that is not answered. (Sahih Muslim)

Agar hasil kiya hua ilm insan zaya karde, ya aise iLm hasil kare jo uske liye fayedamand na ho to phir duniyaparasti uski kashish ban jati hai. Woh internet par, whatsapp par waqt ko zaya karne lagta hai, fizul chizo me gum ho jata hai, lahw me mubtala ho jata hai.

Entertainment ke mukhtalif zaraye talash karne lagta hai. iLm hasil karne ke baad bhi agar iman ki hifazat ka intezam na kiya jaye to ain mumkin hai ki insan apni zindagi ka maqsad bhool jaye. Woh bhool jata hai ki waqt bhi Allah ki ek nemat hai aur uska use hisab dena hai.

Yaha se uske gunaho ka silsila shuru hota hai phir sagheera gunah ahista ahista kab use kabira gunaho ki dehleej par la kar rakh dete hain, pata hi nahi chalta. Ab woh ek gaafil insan ban jata hai, jiski nazar me islam ki aur iman ki koi keemat baki nahi rahti. Woh aisi neend me so jata hai jisme uski aankhen to khuli hai lekin use aakhirat dikhayi nahi deti. Woh aakhirat ko bhool jata hai.

Woh qabr ke azab aur qabr ke sawal bhool jata hai. Hubb ad duniya ki wajah se uska iLm aur iman use chhood kar chala jata hai. Woh roz e mehshar ko bhool jata hai.

Woh is faani duniya ka ghulam ban jata hai. Woh bajaye ibadaat ke, is faani duniya me sukoon dhoondne lagta hai, use duniyawi chizo se itminan hasil karna chahta hai aur is daud me woh haram o halal ki tameez bhi bhool jata hai.

Use shaitaan bhatka deta hai ki masjid, madaaris, iman, islam se tujhe kya milega? Is tarha uska dil bimar ho jata hai. Nifaaq (hypocrisy_ uske dil me ghar kar jata hai. Hum sab ko chahiye ki hum Allah se iman ki hifazat ki dua karen. Allah hum sab ko iman ki salamati ata farmaye. Aamin.

(Rabbana la tuzigh quloobana baAAda ith hadaytana wahab lana min ladunka rahmah innaka anta alwahhab.)

Our Lord! Let not our hearts deviate after you have guided us and grant us from yourself mercy.

Indeed, you are the Bestower.
Aye Hamare Rabb! Tu Hamaare dilon me kachi paida na farmana, hame apni hidayat bakhshne ke baad, balke apne khaas fazl o rahmat se nawaaz de, kyon ke Tu to bada ataa farmne wala hai. (Al-‘Imran:8)

Dalit aur Musalman ke saath jo Na-insaafi horrahi hai aur unpar jo zulm ho raha hai uske khilaaf awaaz uthaane waale Asaduddin Owaisi hai.

Musalmano ke Sharai huqooq pe jo hamla hua, aur ho raha hai uske khilaaf ladne waale Asaduddin Owaisi hai.

Fake encounter mein Ishrat Jahan ka jo case chal raha hai uspe awaaz uthaane waale Asaduddin Owaisi hai.

Fake terrorism charges lagaake jo musalman naujawano ko jo phasayagaya ya phasaya jaata hai uske khilaaf awaaz uthaane waale Asaduddin Owaisi hai.

National Debates me Musalmanon per aiteraaz karne walo ka muh-tod jawab dekar unka muh bandkarne wale Asaduddin Owaisi hai.

Aap apni galli mohri ya naale ka sonch rahe hai – aapku sukoon se rehne nai denge dusre log ikhtidar mein aaye toh – dusre jagah dusre shahro ka haal dekho – bank mein tak musalman aurat niqab lagaake gayi toh uspe haqeer nazro se dekhte hai – security guard bolta hai niqab utaarke jaao – Alhamdulillah ye mahoul hamare state mein nai hai aur sirf musalman hi nahi balke ghair- musalmaan log bhi hamare shahar mein safe hai  – Alhamdulillah.

Dusre ummeed waar jo jo opposition parties se aa rahe hai ye sab ande mein ke chooze hain – inko politics ka alif bhi nai maalum – aur inki nahi chalti – yaad rakho party office ya party president ke hukum pe rehte ye log – aur woh parties aapke haalat nai samajh sakte – sirf development ke naam pe mhoriya naaliya banaate bolker aapke takleefo se faaidah uthaare – bada picture dekho mere bhaiyon – dur ka soncho – national level pe apni identity hai toh woh hai MIM – aur yeh MIM ki numyandagi sab ki aankh ka kaanta hai – congress/BJP/RSS/Media..waghaira waghaira

Pre matric post matric scholarships Asaduddin Owaisi ki wajah se aye.

Govt job posts ke liye recommendation letters likh ke dene waale Asaduddin Owaisi.

Kayi behatreen schools old city mein establish karne waale Asaduddin Owaisi Akbar Uddin Owaisi hai.

Demonetisation pe zyada awaaz uthaane waali MiM

Farmers ki koi awaaz nai hai.. Unka kya haal hora dekho.. Protest karne ki naubat aagayi uske baad bhi lathi charge karke unpe zulm ho raha hai.. Toh Jiski koi awaaz nai rehti uska ye haal hota Musalmaano!! Minorities Dalit samjho is baat ko!!

Hyderabad ke Logo Musalmano Ehsaan Faramoshi Mat Karo – Ehsan Faramosh Mat Bano

Tum Apni Taqat Ko Apne Haato se Barbaad Mat Karo

Tum Apne Payr Pe Khud Kulhaadi Mat Maaro

Tum Aqalmand Log Ho – Halaat Ki Nazaakath Ko Samjho – Dur Ki Nazar Dur Ki Sonch Rakho

APNA VOTE SIRF MIM KO DO!!

Naweed Hasan is an ardent entrepreneur and an engineer by profession. He regularly writes for the Milli Chronicle.

Disclaimer: Views expressed by writers in this section are their own and do not reflect Milli Chronicle’s point-of-view.

Aaj masjid ke darwaze par shaadi kar card le kar logo ke saamne hath phailae hue khadi hai, mahaz isliye ke us ladke se uska nikha tay hua hai. Yeh nikaah hai ya zillat aur musibat ka aaghaaz?

“Waqayi Allaah kisi qaum ki haalat ko nahin badalta jab tak woh khud apni haalat ko na badle, aur jab Allaah kisi quam par museebat daalna chaahe to us ke hatne ki koi soorat nahi, aur Allaah ke siwa koi unka madad-gaar nahih rehta.”  (Surah Ar-Ra’d 13:11)

Ladki aur uske walidain / rishtedaaron ki ma’aashi haalat kharab hai, unki yeh ghurbat, bebasi, lachari aur mohtaaji is duniya ke aarzi masaail hain, jo maut se saath khatm ho jayenge. Yeh unke liye aazmaaish hai. Yeh tajjub ki baat nahi ki aise masaail se ghira insaan, shadi byah wagairah ke mauko par logo ke saamne haath phailane par majboor ho jata hai. Yeh fitri chiz hai. Lekin aham sawal yaha par chaar hain:

Ek to yeh ki taawoon ki darkar rakh kar woh garib family ladki ki shaadi mein kis par, kitna aur kyon kharch karti hai? Agar waqai me zarooriyat-e-zindagi ke asbaab unhe mayassar nahi aur logo se woh aisi chizo par kharch karne ke liye madad talab karte hain jiske bagair guzara nahi ho sakta to phir thik hai.

Is par tambeeh nahi ki jaa sakti. Lekin agar be-jaa israaf aur dikhawe ki buniyad par sainkdo logo ke khaane ki dawat rakhna darkar hai to phir yeh logo ke maal ki sadka khairat aur zakat keh kar lena aur uske na-jaaiz kharch karna hua.

Ladki walo ki taraf se khane ki dawat ka salaf se koi saboot nahi milta, siwaye ki door se musafir ban kar log aaye ho aur unki mehman nawazi ki jaye – shadi ki buniyad par nahi lekin mezbaan hone ki aur husn-e-akhlaaq ki buniyad par.

Isse bhi zyada ghair sharayi aur bebuniyad baat yeh hai ki masaajid me elan karwa kar, logo se chanda jama karke, jamiyato se tauseeyah (authentification letter) le kar, logo se imdad manga aur phir woh paisa ladke wale ko bataur se dahej dena jiska doosra naam shaadi karne ke liye rishwat lena bhi ho sakta hai.

Jee ha, yahi to hai!! Us be-ghairat ladke ke gharwalo ne bilkul naa-jaiz condition rakhi hai, ki agar rishta hoga to maal o mataa ki buniyad par hoga. Agar list me likhi sari chize dulhe ko faraham ki jaye, tab hi mamla set hoga, warna nahi. Ajeeb saude baazi hai, aur dar-asl yeh saudebaazi is note ka topic nahi, balki musibat yeh hai ki log zakat aur sadka samajh kar tawoon karenge aur phir woh paisa aise naakaara aur na’maqool beghairat insaan ke mooh me thoonsa jayega jo yeh kehta hai ki shadi ki buniyad par yeh paisa mere education, meri personality, mere status, mere khaandaan aur mujhse talluk qayam karne ki keemat hai!! Kya waqai yeh aapki charity ka fair investment hai? Kya waqai is tarha ka mutalba karne wale “musta’hiq” ki category mein aate hain?

Hume pata hai ki logo ke intentions ko jaan’na aasan nahi aur hadith ka bhi mafhoom hai ki ek insaan kisi zaani aurat ko, phir kisi chor ko phir kisi maaldaar ko anjaane me khairaat de deta hai to usse kaha jata hai ki woh yeh na samjhe ki uska diya hua maal zaya ho gaya, balki uski niyyat sadka karne ki thi, uska sawab use zaroor ba zaroor milega. in sha Allah. Lekin shaadiyo ke naam par logo se maal ikat’tha karne ka yeh system samaaj me nasoor ki tarha kuch is tarha phair chuka hai ki authenticity ka percentage kam se kam hota ja raha hai, aur ghehu ke sath ghun bhi pis jata hai.

Doosra sawal yeh hai, ki woh ladki jo kuchh dino baad jis ladke ki nikaah me aane wali hai, uske aadhe deen ko mukammal karne wali hai, uski nasl ko aage badhane wali hai, uske ghar ki raunak banne wali hai, woh ladki (ya uske koi rishtedaar) aaj masjid ke darwaze par shaadi kar card le kar logo ke saamne hath phailae hue khadi hai, mahaz isliye ke us ladke se uska nikha tay hua hai. Yeh nikaah hai ya zillat aur musibat ka aaghaaz? Us ladke ki ghairat, uska self respect, uska common sense kaha gaya? Kya waqai me uski aql maari gayi hai? Jee ha bilkul!

Use itna bhi sha’oor nahi ki usne ya uske gharwalo ne ladki se bejaa mutalabon ki jhadi barsa kar ladki aur uske gharwalo ko beizzati aur zillat ki dehleej par laa kar khada kar diya hai? Phir kaun se mooh se woh sherwani pehan kar baatees dant dikha kar stage par khada ho kar mubarakbaadiya qubool karta hai?

Us zaalim ne to ladki aur uske gharwalo ki zindagi me ek toofan barpa kar diya, jo insan bhook se tadapne ke bawajood aur maut ke qareeb hone ke bawajood bhi kabhi kisi ke saamne hath phailane ki jurrat nahi karta tha, aaj woh logo ke samne mahaz isliye haath phaila raha hai ki usne is bewakoof ladke se apni beti ka rishta tay kiya hai?

Kya isi ko “qawwam” aur “rijaal” kaha jata hai? Hargiz nahi!! Zaroorat hai ki is qaum ka naujawan ba’shaoor ho, jaage, aur is ghaleez system ko band kare aur karwaye. Agar nahi kar sakta to phir woh apne “mard” hone ke daawe aur bharam ko chhood kar choodiyan pahan le.

Teesri baat yeh hai ki is saari system aur bawaal ke zimmedaar hum khud hain. Hame chahiye ki sabse pehle to society me is rasm o riwaaj ko band karwayeh aur shuruaat apne ghar se karen. Ladki walo ki taraf se kisi bhi chiz ka mutalba na karen yaha tak ki unki taraf se dawat bhi band karwaye.

Nikaah Nabi sallallahu alaihi wa sallam ki sunnat hai aur sunnat me apni nafs ki dakhal’andaazi karna shariyat, akhlaaqiyat, muaamlaat aur islam ki talimaat ke sath khilwaad karna hai. Jo insan hamesha apne aap ko tawheed parast kehta hai, aise mauko par nafs ko apna mabood bana leta hai.

Yeh society culture aur maujooda muaashra hai, jo israaf se badh kar tabzeel tak pahuch jata hai, aur logo ladki walo ki taqreebat ko shadi ka lazim hissa qarar de dete hain aur samajhte hain ki iske baghair shaadi mumkin nahi.

“Log kya kahenge” ka shoshaa humne hi chhoda hai aur ab woh bandar ki dum me aag lagane ka kaam kar chuka hai. Yeh aag phair chuki hai. Zarurat hai ek zaheen fire brigade aur fire extinguisher ki. Shadiyon ke functions ko muzayyan karke high society walo ne middle class aur lower middle class ko bhi majboor kar diya hai, ki woh samajne lage hain, ki hamari bachhi ki shaadi bhi fala fala rasm o riwaj ka bagair nahi ho sakti. Yeh tasawwur saare maujooda muslim muaashre ke mooh par zordaar tamacha hai jisne dawa to salaf ki pairwi ka kiya lekin jab khushi ka mauka aaya to pick and choose ka deen apna liya.

Chauthi aur aakhir baat. Woh ladki jis par ladke aur uske ghar walo ne naa sirf shaadi ke waqt balki nikah ke baad bhi waqtan ba waqtan dahej ke naam par sitam dhaya hai, uski nazar me apne shauhar ka kya izzat o waqaar reh jayega?

Aakhirat ke roz biwi se pucha jayega shauhar ke akhlaaq aur qirdaar ke bare mein. Uski gawahi mana rakhti hai. Tawheed aur huqooqullah ke baad insan ki qamyabi ka us par daromadar isi par hai ki woh apne gharwalo se sath kaise pesh aya tha. Yaha to mahar se pichha chhudane ke khwahishmand bhi bahut hai. Huqooq ul ibaad ke sath aisa khilwaad? Goya ki nikah ki sunnat ko hi nahi balki nizam e zindagi ko bhi mazak bana kar rakh diya.

Jab shauhar apni biwi ko lekar air conditioned car aur bunglow me aish kar raha hoga to kya baar baar us aurat ke samne apne majboor maa baap ka chehra nahi aayega, jinho ne zillat o khwari jhel kar aise insan se uska nikah karwaya?

Sawalo ki fehrist lambi hai, lekin saare jawab aapke paas maujood hai. Allah hum sabko nek tawfeek ata farmaye, khurafat se door rakhe aur hidayat’yafta logo me hamara shumar farmaye.

Shaadi ya nikaah ko aasan banane ke mutallik kaee ahadees aayi hain. Nikah ko Islam me itna aasan banaya gaya hai ki agar kisi ke paas maal na ho aur use Quran ka iLm ho to woh apni biwi ki Quran sikha de, wahi uski mahr hogi. Ghurbat ki buniyad par nikah takheer se karna, yeh Islami taleemaat nahi hai. Agar kisi ke paas maal-o-mata na ho aur woh nikah ka intekhab kare to Allah uske rishto me barkat aur uski rozi ka intezam kar dega, in’sha’Allah.

“Sabse behtar shaadi woh hai jisme kharch kam ho” (mafhoom)
(al-Bayhaqi – Shu’ab al-Iman, Mishkat al-Masabih).

Agar paiso ki shakl me mahr di jaye to use bhi maqool karne ki taqeed hai taaki dulhe par bojh na ho aur isi tarha waleema ke bare me bhi kaha gaya hai :

Anas radiyallaho anho riwayat karte hain ki Nabi ne ‘Abd al-Rahmaan ibn ‘Awf radiyallaho anho  se (jab unka nikah hua to) kaha: “Waleema karo, chahe ek dumba (sheep) hi kyon na ho.” (mafhoom)
Sahih Al-Bukhari Hadith 8.395

In sab baton se pata chalta hai ki nikah hamare muashre me shara’an bojh aur sar’dard nahi hai, logo ne bana liya hai. Aur is qadr bana liya hai, ki khilaf-e-sunnat nikaho ki wajah se zindagiyan barbaad ho jati hain.

Ladki walo par jahez ka bojh dalne ke bare me kaee tafsire ho chuke hain. Is post me us mas’ale ka zikr nahi hai, balki ek alag musibat ki baat karna chahte hain, jiske sath ummat aankh’michauli khel rahi hai, nazarandaz kar rahi hai aur barbadi ka shikar ho rahi hai. Woh kya hai?

Agar ladka baaligh ho jaye aur nikah ki umr ko pacuch jaye, thodi bahut kamayi bhi shuru kar de, jisse woh apne gharwalo ka pet paal le, aur use yeh bhi andaza ya yakeen ho ki itni aamdani me mein apni hone wali biwi ke akhrajat bhi utha paunga, to use aur uske gharwalo ko chaihye ki phir nikah ke mamle me zyada takheer na kare, khoosoosan tab-jab ladki wale bhi

Deendari ki buniyad par showbaazi kiye bina, saadgi se nikah karne ko tayyar ho.

Lekin mamla iske bar’aqs yeh dekha jata hai, ki maujooda muashre ya society ne kuchh unwritten rules bana rakhe hain, itni tadaad me waleeme me guests ko invite karna, fala fala function hall ya marriage hall / shaadikhaane me program rakhna, dulhan(walo) ko itna itna gold dena yeh laazim qarar diya jata hai, aur yeh baat tayshuda samjhi jati hai ki iske baghair nikah ho hi nahi sakta. 4-5 lakh ya 8-10 lakh ko minimum criteria mutayyan kiya jata hai, aur ladke par sire se walidain ya rishtedaro ki taraf se bojh dala jata hai ki itni rakam ka intezam karo tab ja kar nikah hoga, warna nahi, kyonki hame samaaj me “mooh” dikhana hai (Allah ke samne nahi!)

Is musibat ko ladka bhi gale laga leta hai. Yaad rahe ki yeh kharch shadi “karne” ke liye mutayyan hota hai, naa ki “shaadi ke baad ghar chalane ke liye” kyonki logo ki zehniyat yeh hoti hai ki ghar me to chatni-roti kha kar guzara ho jayega, shadi ek bar hoti hai (kisne kaha ki phir teen martaba aur nahi ki ja sakti?) to zorshor se jashn manaya jaye aur logo ko dikha diya jaye ki yeh hamare laadle bete ki shaadi hai!

Iska anjaam aur is zehniyat ki haulnakiyan kitni khatarnaak hai, use gosh-guzar karna maqsood hai.

1) Jab ladke par yeh bojh daal diya jata hai, to phir use lagta hai ki apne mulk me rah kar itni rakam ka intezam karna practically possible nahi. Woh doosre mulk me job ki koshish karta hai, contract sign karta hai, jo barso tak chalta hai (shaadi ke baad bhi), yeh kadam kabhi to woh apne liye utha’ta hai to kabhi apni behn(o) ki shadi karwane ke liye. Yaad rahe ki is jadd-o-jahad ka maqsad shaadi karne tak hi mehdood hota hai, target wahi hota hai ki itna itna paisa jama ho jaye, shaadi “ho jaye”..bass. Is pasmanzar me jab woh doosre mulk me job kar leta hai, phir is bich kuch rakam jama ho jati hai, aur shaadi ho jati hai, phir use laaziman apne mulk se bahar jana hai. Har koi family visa afford nahi kar sakta.

Shaadi ho jane ke baad yeh bhoot sar se utar jata hai aur use ghar me zyada waqt bitane ki zaroorat mahsoos hoti hai, jo kaafi had tak namumkin hota hai, kyonki yeh sirf tab ho sakta hai jab use chhuttiya mila, warna nahi. Umr ka ek hissa isi tarha guzar jata hai, jis career ki shuruat usne mahaz “shaadi karne ke liya paisa ikath’tha karne ki garz se” ki thi, woh career ab use achhi nahi lagti aur woh sochta hai ki kash mene yeh kadam na uthaya hota ya shadi me itna kharch na kiya hota to shadi ke baad ki zindagi me yeh paisa kaam ata. Isi afsos ke sath budhapa aa jata hai.

2) Doosri shakl yeh hoti hai ki jab saadgi se shaadi karne par samaj rok lagata hai aur bekar ki formalities ke liye dher sare paise kharch karne ke liye andarooni zabardasti hoti hai, aur jab ek insan nahi kar pata to phir hame pata hona chahiye ki aakhir woh bhi ek mard hai aur uske andar bhi Allah ne jinsi khwahishat rakhi hai. Kabhi to aise naujawan masturbation, pornography movies literature wagairah ki taraf maail ho jate hai jisse unke gunaho me izafa hota hai aur kabhi to unki sexual health par buri asar hoti hai. Isse aage badh kar kuch naujawan zina ki taraf aage badh jate hain, aur is tarha unki dunya wa aakhirat barbad ho jati hai. Na sirf unki balki agar woh log rape jaise crimes kar baithe to phir samne wale ki zindagi bhi tabah kar deta hain. Iska gunah aur iski zimmedari kis par hai?

3) Teesri shakl yeh hoti hai ki kisi bhi tarha paisa jama karna hai. Zariya chahe “kuchh bhi” ho. Kuchh log karz me doobte chale jate hai. Karz e hasana ho tab bhi yeh bada bojh hai, jab ki ummat ka ek tabka aisa hai jo bank loans aur soodi nizam ke chakkar me bhi pad jata hai kyonki ab umr ho gayi hai, shaadi karna hai aur itni itni tayyari karna hai, saadgi se shaadi na to hamne ki thi, na hamare baap dada ya par’dada ne, miya gire par tangid oonchi ki shakl hoti hai aur karz me doob kar. Allah aur uske rasool (sallallahu alaihi wa sallam) se jung ka elan karke (sood le kar) bhi shaadi me beshumar kharch karte hai, yeh nahoosat aur yeh bimari bhi aajkal ummate muslima me nasoor ki tarha phail chuki hai. Khwahishat e nafs ki pairwi me aur “arman nikalne” ke bahane me insan kis had tak gunaho me mulavvis hota chala jata hi, pata nahi chalta. Phir umr ka ek bada hissa us karz aur sood ko chukane me lag jata hai, aur ek waqt ata hai jab woh sochta hai ki yeh bhi kya zindagi hai, kash mene saadgi se shadi ki hoti.

Aur jo log na to sood me mulavvis hote hain, na unhe behrooni mulk jaa kar kamane ki zaroorat padti hai, na fahashi me mubtala hote hain, na shaadi me taakhir karte hain, balki sahib-e-nisaab hote hain aur baap dada ki badi jaagiren jinke paas hoti hain, woh log yeh samajh kar fizul kharchi aur shaadi me man’maani na karen ki hum log to sirf apna halal paisa apni marzi se kharch kar rahe hain, kyonki woh log bhi beja israaf karne ke gunah me pakde jayenge. Yahi woh log hai jo ummat ke maaldaar tabke se talluk rakhte hain, jo trendsetters hote hain, unhi ki wajah se society me mahol banta hai aur ghareeb par bhi yeh binzaroori zimmedari ayad ki jati hai ki tumhe bhi isi shaadi aur waleeme ki is tareeka-e-qaar se guzarna hoga aur isi shano shaukat se mehman nawazi karni hogi, jo ameero ka sheva hai. Inhi ki wajah se tarha tarha ki dishes serve karne wali catering services, wedding cards ki printing industry, tagdi fees wasool karne wale mahal-numa function halls aur zeenat’afroz shahi libaas banane wale wedding wear, party wear, ethnic dresses ke naam par textile industry phoolti’phalti hai aur ummat kar arbo rupya ek do din me dhuan dhuan ho jata hai.

Iske alawa bhi kaee musibato se insan do-char hota hai, lekin agar inhi halaat par ghaur karke aag lagne se pahle hi ummate muslima ke ghehri neend me soye hue log koonwa khod le to behtar hoga. Allah hum sabko gunaho se mehfooz rakhe. Aamin.

Aksar qisson me aisa hota hai ki shadi ka maqsad hi couple samaj nahi paati, ya maturity nahi hoti, chhoti chhoti baato me bardasht karne ki samaj aur aql nahi hoti..

Aur jo tum mein be-nikaah hon unka nikaah kar diya karo, aur jo tumhaare ghulaam aur laundiyan nek hon unka bhi, agar woh muflis honge to Allah apne fazl se khush-haal kar dega, aur woh bahut wus’at walaa aur khoob janne wala hai.”
(Qur’an Surah an-Noor 24:32)

Insan ke liye Allah ne uska rizk muqaddar kar diya hai. Jis tarha uski maut uski taaq me rahti hai, usi tarha uska rizk uske pichhe pichhe laga rahta hai. Nikaah karna barkat aur rizk laata hai jaise ki surah an Noor me bataya gaya hai. Agar shaadi ke baad halaat tang ho to shauhar biwi ko sabr ka daman thaame rakhna chahiye, halal tareeke se rizk talash karne ki koshish karna chahiye aur Allah se mayoos nahi hona chahiye kyon ki mayoosi kufr hai.

Har mushkil ke baad aasani hoti hai. Insan ko aur khusoosan ek musalman ko chahiye ki woh halal rizk ki talash me hattal imkaan jaddo jahad kare, susti aur kahili aur duniya parasti chhode aur Allah par kaamil bharosa rakhe, kyonki agar woh aisa karega to jaise ki hadees ka mafhoom hai

“Umar bin Khattab (Radi Allahu Anhu) Se Riwayat Hai Ki Rasool’Allah (Sallallahu Alaihay Wasallam) Ne farmaya

“Agar Tum Allah Par Is Tarah Bharosa Karo Jis Tarah Bharosa Karne Ka Haq Hai To Woh (Allah) Tumhe Is Tarah Rizq Dega, Jis Tarah Parindo Ko Rizq Deta Hai , Subah Ko Wo Bhukhe Nikalte Hain Aur Sham Ko Wo Pet Bhar Kar Wapas Aate Hain.”

(Jami’at Tirmidhi, Vol 2, Hadith no. 225)

Zaroorat hai ki woh tawakkal al-Allah ko thaame rakhe.

Auraton ko bhi chahiye ki woh apne shahuhar ki hausla afzaayi kare, beja israaf na kare, aur qana’at (contentment) se kaam le, bina zaroorat ki chizo ka mutalba na kare, fashionparasti se gurez kare, kharch karne me hudood paar na kare. Agar woh aisa karti hai to woh Allah ki ek mukarrab bandi ban jaati hai. Aur agar woh aisa na karegi, to phir darr hai ki ghar ke laazim akhrajaat ke alawa doosri zarooraton ko poora karne ke liye shauhar kisi ke saamne hath phailaye, karz le ya haram rizk ka intekhab kare jo bada gunah hai aur is gunhah me biwi bhi jane anjaane shamil ho jayegi.

Hadees me jaha aata hai ki jo aadmi nikah ki istetaa’at na rakhta ho woh roze rakhe (taaqi apni nafsani khwahishat par qaboo paa sake) aur isi tarha Surah An-Noor me jaha aaya hai (mafhoom) ki agar “woh ghareeb ho to Allah unhe apne fazl ke daulatmand bana dega”, iski tashreeh me Imam Bukhari rahimahumullah ne ek khaas baab (chapter) bandha hai, ““Chapter on marriage of one who is in financial difficulty” (Maali iste’ta’at na rakhne walon ki shaadiyan) jiske zariye ulema ne samjhaya hai ki maujooda ghurbat ki halat insan ke liye shaadi na karne ki wajah nahi hoti.

Nabi sallallahu alahi wa sallam ke daur me mash’hoor hai ki aise sahaba jinke paas tan dhankne ke liye poore kapda na the unki bhi Nikah karwayi gayi aur ghulam mard aur aurato ki bhi shadiyan karwayi gayi. isse yeh sabit hua ki jo insan shaadi ke aur uske baad ki zindagi ke akhrajaat uthane ki isteta’at rakhta ho use Nikah karne par jaha islam ne ubhara hai, wahin jo maali taur par isteta’at nahi rakhta use shaadi karne se roka bhi nahi gaya hai, kyonki agar woh aisa karega, to phir darr hai ki kahi zina ki taraf na chala jaye aur doosri taraf Allah rizk ka maalik hai, aur Allah apne bando ke sath waisa hi mamla karta hai jaise ki banda Allah se tawakko rakhta hai.

Muashre me aise log hone chahiye jo ghareeb tabke ke musalmano ko ghar basane me aur use baad chhota mota karobar setup karne me madad karen. Insano ki aksariyat apne apne mamlaat me mast aur magan khudgarz nazar aati hai, aisa nahi hona chahiye kyon ki yeh bhi ek musalman ki social aur moral responsibility hai.

Iska ek aur pahlu yeh hai ki shaadi se pahle ek musalman mard apne aap ko education, talent aur mehnat ke zariye sanwarne ki koshish kare aur jaddo jahad kare kyonki shaadi sirf zindagi ke maze uthane aur lutf lene aur sath sath rahne ka naam nahi balki uske sath sath ek aham zimmedari uske kaandho par aati hai.

Aur in sab chizo ke baad ek ahamtareen pahlu yeh bhi hai ki maa baap ko chahiye ki jab bachche baaligh ho jayen to woh unki is tarha tarbiyat karen aur shauhar o biwi ke aapasi ehkaamaat se unke ilm me izafa karen taaki aane wali zindagi woh samajhdari se guzar saken. Aksar qisson me aisa hota hai ki shadi ka maqsad hi couple samaj nahi paati, ya maturity nahi hoti, chhoti chhoti baato me bardasht karne ki samaj aur aql nahi hoti, jiski wajah se ya to ghar toot jate hain, talaq aur khula ki naubat aa jati hai, ya to biwi apne mayke jaa kar baith jati hai phir shauhar ki zindagi zahar ban jati hai, bachcho ka mustaqbil andhere me chala jaata hai aur walidain jinho ne badi khushi se apne bachcho ka ghar sanwarne ke liye unki shadiyan karwayi thi woh muashre me bewajah badnaam ho jate hai.

Isliye shaadi byah ke preparations me dar’asl khubsurat kapde, marriage hall ki bookings, lazeez khane aur decorative furniture nahi balki tarbiyat ka pahlu zyada aham hai, taki aane wali zindagi me ghar ki buniyad mazboot ho. Aur yeh tab mumkin hai jab maa baap khud bhi aapas me sabr o qana’at ke sath ba’akhlaq aur ba’qirdaar zindagi basar karen, kyonki bachche unko dekh kar sikhenge aur zindagi ka ek nazariya – ek perspective unke samne wazeh hoga ki zindgi is tarha guzari jaye.

Allah se dua hai ki jinki shadiyan nahi hui ya nahi ho pa rahi, aur jo shadi shuda log tangdasti me mubtala hai, Allah un sab ke masail ko hal farmaye aur mualmaano ke rizk me khair o barkat ata farmaye. Aamin.

“Bila-shuba jo Imaan laaye nek kaam karte rahe, unke liye baaghaat hain jin ke neeche nehren beh rahi hain, yeh badi kaamiyaabi hai.” (Qur’an – Surah Al-Buruj 85:11)

Ilm insan ki niyyat banta hai, aur niyyat amal ki shakl ikhtiyar karta hai. Amal se pahle insan kasb aur azm ki wadiyon me jata hai phir waha se amal produce karta hai. Phir us amal ke nataaij insan ke samne aate hain. Nataij ka woh muhasiba karta hai. Jaha se insan ka ilm process hota hai woh uska dil hai aur islam ne insano ki falah ke liye qalb-e-saleem ka mutalba kiya hai.

Woh dil jo keena kapat se paak ho, jo shirk o bidaat se paak ho, jo gheebat o chughli se, fahashi aur gandagi se, doosro ko gira kar khud upar uthne ke dhinaune jazbe se paak ho, hasad se, bughz se, besharmi se paak ho. Taqabbur se, ghamand se, ehsas e bartari se paak ho. Ilm hasil kar lena kaafi nahi. Apni nisbat salafiyat ke sath kar lena kaafi nahi. Taqwa aur tawheed, manhaj aur ibadat ko muakammal kar lene ka ehsaas to muslamano me aa gaya, ulema ki sohbat bhi ikhtiyar kar li, social welfare ki kuchh activities me bhi jud gaye, sadka khairat kar liye, debates kar liye aur phir is khwab e khargosh me kho gaye ki hamara shumar firka e najiyah me ho gaya.

Ilm agar dil ki wadiyon se aaya aur guzar gaya, insan me bina koi change laye, bina koi inqelaab barpa kare, insan suna, hifz kiya, tilawat ki lekin mehsoos nahi kiya, haqq ke mizan me apni akhlaqiyat aur muamlat ko nahi tola to aise ilm ka kya fayeda?

Agar yeh ilm use sabr e jameel ki dehleej par na pacucha saka, fajr ke waqt neend se bedar na kar saka, khwahishat e nafs ki gulami se aazad na kar saka, uske nafa wa nuksan ke meyar ko aakhirat ke nazariye se parakhne ki salahiyat na de saka, uske gusse aur gazab aur junoon par control na la saka, shaadi byaah ke mauqo par galat rusoomat se use na rok saka, halalo haram ki tameez na sikha saka to phir apni nisbat salafiyat ke sath karne ke bawajood woh mazeed pasti aur andero me doobta chala jayega.

Hanzla radiyallaho anho ko fikr thi ki jaise kaifiyat unki Nabi sallallahu alahi wa sallam ke samne jannat aur jahannum ka tarruf sunne par hoti hai, waise ghar me biwi bachcho ke sath nahi hoti, aur is par unhe darr laga ki kahi woh munafikat ki dehleej par kadam na rakh de. Mujhe aur hum sabko chahiye ki hum nifaaq wale khushoo se daren.

Nifaaq wala khushoo kya hai? Bazahir to hum society me, dosto me, logo ke samne bahut hi balanced, sanjeeda aur ba’akhlaaq nazar aate hain, lekin hame chahiye ki hum apne nafs ke andarooni muamlaat ko bhi waise hi durust karen jaise ki hum zaahiri taur par nazar aate hain. Jab yeh kaifiyat hogi tab ja kar hamara taqwa aur tawakkal mazboot hoga. Jab hum gaflat se bedar honge, kahili, susti aur fizool chizo ko tarq karenge tab ja kar hamara ilm hamen fayeda pahucha sakega, in’sha’Allah.

Jis din hum in andheron se bahar nikal kar sarsari nafa dene wali chizo ke bajaye “Al Fauzul Kabeer” (the great success in hereafter) par focus karenge, talluk-bil-Allah qayam karenge, us din hamare urooj ki shuruaat hogi aur in’sha’Allah ul azeem hum us maqaam par pachuch jayenge jaha pahuchne me qaumo ko hazaro saal lag gaye.

Allah hum sab ko nek amal ki aur muhasiba e nafs ki tawfeek ata farmaye, aur duniya wa aakhirat me kamiyabi ata farmaye. Aamin.